Riom-Parsonz
Igl anteriour cumegn da Riom-Parsonz era naschia igl 1. da schaner 1979 or dalla fusiun digls cumegns uriunds Riom e Parsonz. La voba mossa igl marcant casti Rätia Ampla tgi è vasibel gliunsch anturn. Tottas dus vischnancas èn situadas dalla vart sanestra dalla val Surses, Riom sen radond 1250 m sur mar e Parsonz bung 100 m pi ot.
Ainten la mesadad digls onns 1970 ins ò catto a Riom restanzas da miraglias romanas. Egn digls bietgs veva dimensiuns imposantas da 20 sen 30 meters ed ins suppona tgi chel bietg sarviva scu mutatio, damaias scu albiert da cutier cun stallas per suldos e viagiatours. Chesta pensiun era situada alla ruta digls pass digl Gelgia e Set. Aint igl urbari digls bagns imperials anturn igl 840 era Riom numno scu bagn roial cun ena baselgia. Chella era l'amprema dalla val.
Or da chel taimp è er igl nom Villa Riamio. Pi tard ins catta igl nom Ryams scu li dalla dertgira Surses. Parsonz vign numno l'amprema geda igl onn 1156 scu Coloniam de Presam. Riom era anfignen aint igl 19avel tschentaner igl center politic e giudizial dalla val. Chegl sa mossa er ve digl casti imposant tgi è ia igl 1258 ansemen cun tot igl schaschant local aint igl possess digl uestg da Coira.
Igl onn 1864 è capito a Riom en incendi sgarschevel tgi ò devasto prest l'antiera vischnanca. L'arsa digl 1913 è alloura stada manc desastrousa. A Parsonz ègl ars igl onn 1949, nov tgesas e clavos èn davantos unfrendas dallas flommas.
La tgesa Sontga Crousch è situada marcantamaintg agl our vers nord dalla vischnanca da Riom. La tgesa è neida errigeida curt siva la grond'arsa igl 1867 da Lurintg Maria Carisch, tgi era turno scu om retg da Paris puspe ainten la sia patria. Igl onn 1930 è igl bagn nia vandia allas mongias da Menzingen. Siva digl 2011 appartignan tgesa, clavadeira e curtegn alla fundaziun Origen tgi ò an senn d'installar a Riom igl center cultural cun salvs d'exposiziun, salvs da prova, luvratoris, administraziun ed oter ple. Ainten la clavadeira ò igl festival installo en'infrastructura tgi lubescha producziuns e represchentaziuns sur igl antier onn, damaias er d'anviern.